ភ្នំពេញ៖ សមាជិកសភាវ័យក្មេងមកពីគណបក្សប្រជាជន លោក ហ៊ុន ម៉ានី បានលើកឡើងថា សន្ដិភាពដែលកម្ពុជាកំពុងមានសព្វថ្ងៃបានធ្វើឱ្យពលរដ្ឋមានសិទ្ធិក្នុងការចូលរួមនយោបាយ គាំទ្រ និងឃោសនាដល់គណបក្សណាដែលខ្លួនគាំទ្រ។ លោកបន្ថែមថា លទ្ធផលយើងទទួលបាននៅពេលនេះ គឺជាការសរបញ្ជាក់ពីលំនឹងប្រជាធិបតេយ្យ ដែលកម្ពុជាខ្លួនឯង ប្រឹងប្រែងបណ្តុះ និងទទួលបានផ្លែផ្កា។ នេះជាសារដែលលោក ហ៊ុន ម៉ានី សរសេរបង្ហោះលើហ្វេសបុកផេករបស់លោកនៅព្រឹកថ្ងៃសៅរ៍ ទី២១ ខែឧសភា។ 

លោក ហ៊ុន ម៉ានី បានសរសេរថា៖ «ប្រជាធិបតេយ្យរស់ក្រោមម្លប់នៃសន្តិភាពក្រោមម្លប់នៃសន្តិភាព ថ្ងៃនេះ ប្រជាជនកម្ពុជាដែលគ្រប់អាយុបោះឆ្នោត បានចេញដំណើរទៅតាមមូលដ្ឋានរៀងៗខ្លួន ធ្វើចលនាឃោសនាគណបក្ស ដែលខ្លួនគាំទ្រ។ នេះមិនត្រឹមតែជាសេរីភាពបុគ្គល ប៉ុន្តែជាការសរបញ្ជាក់ពីលំនឹងប្រជាធិបតេយ្យ ដែលកម្ពុជាខ្លួនឯង ប្រឹងប្រែងបណ្តុះ និងទទួលបានផ្លែផ្កានៅពេលនេះ»។ 

លោកក៏បានជូនពរដល់ដំណើរការនៃយុទ្ធនាការបោះឆ្នោតជ្រើសរើសក្រុមប្រឹក្សាឃុំសង្កាត់ ប្រព្រឹត្តិទៅដោយជោគជ័យ ក្នុងភាពថ្លៃថ្នូរ និងដើម្បីអនាគតកម្ពុជាតែមួយ។

នៅថ្ងៃឃោសនាបោះឆ្នោតថ្ងៃដំបូងនេះ លោក ហ៊ុន ម៉ានី ក៏នឹងចេញដំណើរទៅមូលដ្ឋានដើម្បីធ្វើការឃោសនាពីគោលនយោបាយបក្សប្រជាជនជូនដល់ប្រជាពលរដ្ឋដែរ។ លោកឆ្លៀតឱកាស ថ្លែងអំណរគុណ ដល់សមាជិកគណបក្សប្រជាជនគ្រប់រូប ដែលបានដាក់ការជឿជាក់មកលើបក្សប្រជាជនកម្ពុជា ជារៀងរហូតមក ហើយក៏សូមជូនពរឲ្យសមាជិកគណបក្សដែលចូលរួមក្នុងយុទ្ធនាការនេះ បានប្រកបដោយភាពជោគជ័យ និងសុខសុវត្ថិភាព។

យុទ្ធនាការឃោសនាបោះឆ្នោតមានរយៈពេល ១៤ថ្ងៃ ចាប់ពីថ្ងៃទី២១ ខែឧសភា ដល់ថ្ងៃទី៣ ខែ មិថុនា គណបក្សនយោបាយនីមួយៗ អាចធ្វើការជួបជុំ ឬការហែក្បួន ព្យុហយាត្រាដោយថ្មើរជើង ឬជា ក្បូនយានយន្ត ចែកខិតបណ្ណ លើកបដា ប្រើឧបករណ៍បំពងសំឡេង ចាក់ផ្សាយវីដេអូជាដើម ដើម្បីផ្សព្វ ផ្សាយពីកម្មវិធីនយោបាយរបស់ខ្លួនស្វែងរកការគាំទ្រពីប្រជាពលរដ្ឋដែលជាអ្នកបោះឆ្នោត ដែលធ្វើឡើងនៅរៀងរាល់ ៥ឆ្នាំម្តង។                       

ការបោះឆ្នោតជ្រើសរើសសមាជិកក្រុមប្រឹក្សាឃុំ/សង្កាត់អាណត្តទី៥ នឹងត្រូវធ្វើឡើងនៅថ្ងៃទី៥ ខែ មិថុនាខាងមុខ ដោយមានគណបក្សនយោបាយចំនួន ១៧ចូលរួម ដើម្បីណ្តើមយកកៅអីក្នុងតំណែងជាសមាជិកក្រុមប្រឹក្សាឃុំ/សង្កាត់ នៅទូទាំងប្រទេសសរុបចំនួន ១ម៉ឺន១ពាន់ ៦២២កៅអី ក្នុងចំណោមឃុំ/សង្កាត់ចំនួន ១ពាន់ ៦៥២ ខណៈប្រជាពលរដ្ឋមានឈ្មោះក្នុងបញ្ជីបោះឆ្នោតប្រមាណជាង ៩លាន ២សែននាក់៕